मधेस प्रदेशमा मन्त्रिपरिषद् विस्तार वारेमा छलफल सुुरु

मधेस प्रदेशको सरकारमा मन्त्रिपरिषद् विस्तार गर्न सोमवार बसेको दलको बैठक विना कुनै निष्कर्ष सकिएको छ । जनमत पार्टी मधेस प्रदेशका दलका नेता महेशप्रसाद यादवका अनुसार कांग्रेस, लोसपा र नेकपा एकीकृत समाजवादी (एस) लाई सरकारमा सहभागी गराउन सोमबार बसेको पहिलो चरणको बैठक सकिएको हो ।

सरकारमा सहभागी हुने दलहरूलाई ७ सांसद बराबर एउटा मन्त्रालय दिने सहमति भएको नेता यादवले जनाए । उनले मंगलबार ८ बजे पुनः बैठक बसेर मन्त्रालय बाँडफाँटबारे टुङ्गो लाग्ने बताए ।

दलका नेताहरूबीच भएको सहमतिअनुसार पाँचदलीय गठबन्धनका सबैभन्दा ठुलो दल कांग्रेसले ३, जसपाले २, जनमतले २, माओवादी, लोसपा र नेकपा एसले १र१ मन्त्रालय पाउने भएका छन् ।

सरकारमा अहिले जसपाले ३ वटा मन्त्रालय पाएको छ । यसरी गठबन्धनबीच मन्त्रालय बाँडफाँट हुँदा जसपाले एउटा मन्त्रालय छोड्नुपर्ने देखिन्छ । एमालेले सरकार छोड्दा खाली रहेको ४ वटा मन्त्रालयमध्ये कांग्रेसले ३, लोसपाले १ र नेकपा एसले १ वटा मन्त्रालय पाउनेछन् ।

सोमबार दलका नेताहरूबीच सैद्धान्तिक छलफल भएको कांग्रेस मधेस प्रदेश दलका नेता कृष्णा यादवले जनाए । उनले अब (भोलि) मंगलबार बस्ने दलको बैठकबाट मन्त्री नियुक्त गरी भोलि नै शपथ ग्रहण गरिने बताए ।