लागूऔषधसहित सर्लाहीमा एक जना प्रहरीको नियन्त्रणमा

सर्लाहीको लालबन्दीबाट ठूलो मात्रामा लागूऔषधसहित एकजना प्रहरीको नियन्त्रणमा परेका छन् । भारतीय बजारबाट ना ५३ प ९७९८ नम्बरको मोटरसाइकलमा लुकाइछिपाई लागूऔषध ल्याउँदै गरेको लालबन्दी नगरपालिका–११ हीरापुरका कृष्णकुमार महतो प्रहरी नियन्त्रणमा परेका हुन् ।

महतोले मोटरसाइकलमा लुकाइछिपाइ राखेको ५ सय ७६ थान ट्याबलेट र १ सय ५८ थान कोडी वेल नामक सीरप बरामद गरिएको प्रहरीले जनाएको छ ।

लालबन्दी बजारमा नियमित जाँचको क्रममा महतोलाई लागूऔषधसहित नियन्त्रणमा लिएको प्रहरी उपरीक्षक नरेशराज सुवेदीले जानकारी दिए । महतो चढेको मोटरसाइकल चोरीको हुनसक्ने आशंका प्रहरीको छ । महतोलाई नियन्त्रणमा लिएर अनुसन्धान कार्य भइरहेको जिल्ला प्रहरी कार्यालयले जनाएको छ ।