अटो दुर्घटनामा मृत्यु भएकाहरूको क्षतिपुर्ति माग गर्दै पूर्व–पश्चिम लोकमार्ग अवरुद्ध – Madhesh Update

अटो दुर्घटनामा मृत्यु भएकाहरूको क्षतिपुर्ति माग गर्दै पूर्व–पश्चिम लोकमार्ग अवरुद्ध

   August 18, 2022  

रौतहटको पौराई जंगलमा भएको अटो दुर्घटनामा ज्यान गुमाउनेको परिवारलाई राहत दिनुपर्ने माग गर्दै पूर्व पश्चिम लोकमार्ग अवरूद्ध बनाइएको छ । बिहीबार बिहान पूर्व–पश्चिम लोकमार्ग अन्तर्गत रौतहटको पौराई जंगलमा काठमाडौंबाट आउँदै गरेको प्रदेश ०३–००१ ख २०१ नम्बरको बसको ठक्करबाट बागमतीबाट रौतहटतर्फ जाँदै गरेको प्रदेश २–२००१ ह २१०९ नम्बरको अटोमा सवार तीन पुरूषको मृत्यु भएको थियो भने एक महिला गम्भीर घाइते भएकी थिइन् ।

सोही घटनाका मृतकका आफन्तहरूले दिउँसो घटनाका पीडितलाई उचित राहतको माग गर्दै पूर्व–पश्चिम लोकमार्ग अवरुद्ध गरिदिएका हुन् । उनीहरूले लोकमार्गस्थित पुतली चोकमा टायर बालेर विरोध प्रदर्शन गरेको इलाका प्रहरी कार्यलय कर्मैयाले जनाएको छ ।

विरोधमा उत्रिएका उनीहरूले सडकमा अटो तेर्स्याएर अवरुद्ध गरेका थिए । राजमार्ग अवरुद्ध हुँदा पूर्व पश्चिम लोकमार्गमा यात्रारत सयौं यात्रु अलपत्र परेका छन् । सडक अवरुद्ध भएको एक घण्टापछि यातायात व्यवसायी संघ र मृतकका आफन्तबीच घाइतेको सम्पूर्ण उपचार गर्ने र मृतकका परिवारलाई उचित राहत उपलब्ध गराउने सहमति पश्चात सडक खुलेको जिल्ला प्रहरी कार्यालय सर्लाहीले जनाएको छ । सडक खुलेसँगै सडकमा अलपत्र यातायात र यात्रु गन्तव्यतर्फ लागेका छन् ।

दुर्घटनाका अटो चालक सर्लाहीको बागमती नगरपालिका–५, टेकानी बस्ने रवि मगर, अटोमा सवार ढंकबहादुर लुंगेलीमगर र प्रेम ठाडामगरको मृत्यु भएको इलाका प्रहरी कार्यालय रौतहटले जनाएको छ ।

सोही दुर्घटनामा परेर ढकबहादुरकी श्रीमती सविना लुंगेली मगर समेत गम्भीर घाइते भएकी छिन् । उनको रौतहटकै अस्पतालमा उपचार भइरहेको छ । घटनामा परेका सबै मृतक एकै गाउँको रहेको स्थानीयले जनाएका छन् । एकै गाउँका तीन जनाको दुर्घटनामा ज्यान गएको खबरपछि गाउँ शोकमा डुबेको छ ।