धनुुषामा सवारी दुर्घटनामा परेर तीन जनाको मृत्यु

धनुषा जिल्लामा सवारी दुर्घटना परेर तीन जनाको मृत्यु भएको छ। सोमबार राति धनुषाको क्षिरेश्वरनाथ नगरपालिका वडा नंं ५ सिन्धुलीटोलमा भएको सवारी दुर्घटनामा तीन जनाको मृत्यु भएको जिल्ला प्रहरी कार्यालय धनुषाले जनाएको छ।

मृत्यु हुनेमा जनकपुर उपमहानगरपालिका वडा नंं ४ बस्ने १९ वर्षीय सुमित टिण्डेवाल रहे पनि अन्य दुई जनाको सनाखत नभएको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक प्रदीप बहादुर क्षेत्रीले जानकारी दिए।

सडक छेउमा रोकिएको ना २ ख ८६२४ नम्बरको ट्रकमा तीन जना सवार लु ८३ प ८६५१ नम्बरको मोटरसाइकल पछाडिबाट ठोकिँदा उक्त दुर्घटना भएको प्रहरी प्रवक्ताले जानकारी दिए।

दुर्घटनामा परेर गम्भीर घाइते भएका ३ जनालाई उपचारका लागि प्रादेशिक अस्पताल जनकपुरधाम ल्याइएकोमा सबै जनाको मृत्यु भइसकेको थियो।

घटनाको विषयमा थप अनुसन्धान भइरहेको जिल्ला प्रहरी कार्यालय धनुषाले जनाएको छ।