पञ्‍चले कानुन हातमा लिएपछि……..

पीडकसँग पीडितको मिलापत्र गराएको अरोपमा प्रदेश–२ बाट १२ जना पञ्च पक्राउ

बलात्कार घटनामा पीडकसँग पीडितको मिलापत्र गराएको अरोपमा प्रदेश–२ बाट १२ जना पञ्च पक्राउ परेका छन् । असोज १ गते यता सप्तरीबाट ३, सिरहाबाट ८ र धनुषाबाट १ गरी १२ जना पक्राउ परेका नम्बर–२ प्रदेश प्रहरी कार्यालय जनकपुरधामका डीआइजी धिरजप्रताप सिंहले जानकारी दिए । आर्थिक दण्डजरिवाना गरी गाउँमै घटना मिलाएको आरोपमा उनीहरुमाथि मद्दा चलाइएको हो ।

जघंन्य अपराधमा पञ्चैती गर्नेहरु विरुद्ध प्रहरी कठोर भएर प्रस्तुत भएको डीआइजी सिंहले बताए । जघन्य अपराधका घटनामा मिलापत्रले पीडितलाई झन पीडा दिन्छ,उनले भने ।

सामान्य झैंझगडा बाहेकका घटना गाउँमै पञ्चैयती गराएको खण्डमा प्रहरीलाई हस्तक्षेप गरी उनीहरुलाई कारवाही गर्न प्रहरी हेटक्वारकै निर्देशन छ । महिला हिंसा, बलात्कार, हत्या जस्ता जघंन्य अपराधका घटनामा पनि पञ्चैत गरेर मिलापत्र गराउन पञ्चहरु पछि पर्दैनन् ।

प्रदेश प्रहरी कार्यालयको तथ्यांकअनुसार चालु आर्थिक वर्षको हालसम्म प्रदेश २ का आठवटै जिल्लामा बलात्कारका ७६ वटा उजूरी दर्ता भएका छन् । आर्थिक वर्ष २०७४/०७५ मा प्रदेशका आठ जिल्लामा एक सय ७० वटा बलात्कारका मुद्दा दर्ता भएका थिए । त्यस्तै २०७५/०७६ मा दुई सय ९६ र २०७६/०७७ मा दुई सय ८५ वटा बलात्कारका मुद्दा प्रहरीले अनुसन्धान गरेको थियो ।

यो त भयो प्रहरीमा दर्ता भएका घटनाको एक तथ्यांक । धेरैजसो गाउँका घटना प्रहरीसम्म आइपुग्दैनन् । पञ्चहरुले गाउँमा मेलाउँदै आएका छन् ।